Լուրեր
Ընդհանուր վիրաբուժական ծառայութանը վերաբերող հարցերին պատասխանում է Արմինա Նալբանդյանը
– Ինչպիսի՞ վիրաբուժական ախտաբանության դեպքերն են առավել հաճախ վիրահատվում Ձեր բաժանմունքում:
– Քանի որ բաժանմունքն ընդհանուր վիրաբուժական է, վիրահատում ենք գրեթե բոլոր ախտաբանությունների ժամանակ, այսինքն, չկա կոնկրետ ուղղվածություն: Բաժանմունքում իրականացվում են նաև գինեկոլոգիական պլանային վիրահատություններ, անհրաժեշության դեպքում հրավիրվում են համապատասխան նեղ մասնագետներ այլ բաժանմունքներից՝ ուրոլոգիայի, նեյրովիրաբուժության, անոթային և այլն:
– Որքանո՞վ են կարևոր ընդհանուր վիրաբուժական հմտություններն, ընդհանրապես, ցանկացած վիրաբույժի համար:
– Նեղ մասնագետ դառնալու համար, նախ, ընդհանուր վիրաբուժությունն են ուսուցանում և հետո միայն մասնագիտանում որևէ ուղղությամբ: Դա ճիշտ մոտեցում է, որովհետև խիստ նեղ մասնագիտացումն առանց ամբողջ օրգանիզմի նրբությունները հասկանալու, տվյալ օրգան-համակարգից դուրս որևէ բարդություն առաջանալու դեպքում, վիրաբույժին կարող է լուրջ խնդրի առաջ կանգնեցնել:
– Կա՞ն հիվանդություններ, որոնք վերջին տարիներին առավել հաճախ են հանդիպում:
– Շատ են դեպքերը և՛ անհապաղ ախտաբանության, և՛ տարբեր վնասվածքների, և՛ ուռուցքների:
Ներկայում շատացել են բարդացած, բարձիթողի դեպքերը, ուռուցքաբանական ախտաբանությունը: Պատճառները շատ են: Դրանցից մեկը տարեցների թվի աճն է, մեծավ մասամբ ուշ են դիմում բժշկի՝ սոցիալական վատ վիճակի պատճառով:
Պատճառներից է այն, որ մեզ մոտ հաճախ են գալիս այլ կլինիկաներում հետազոտված, բայց ինչ-ինչ պատճառներով չհոսպիտալացված, չբուժված և ավելի բարդացած վիճակով պացիենտներ: Երբեմն որևէ տեղ հետազոտվում են, հետո պարզվում է, որ համապատասխան բաժին չկա, կամ ֆինանսական խնդիրներ են ծառանում:
Իսկ չընդունել չենք կարող, հիվանդին ընդունում ենք… Անկախ ամեն բանից, կարևորն այն է, որ հիվանդն արդեն ժամանակին օգնություն է ստացել…
– Անէսթեզիայի ո՞ր տեսակներն եք առավել հաճախ կիրառում:
– Անէսթեզիան հիմնականում իրականացվում է ընդհանուր եղանակով՝ սպինալ, պերիդուռալ, երակային կամ ինտուբացիոն: Տեղային անէսթեզիայով շատ վաղուց վիրահատություններ չեն իրականացվում:
– Վիրահատության դասական ձևերից բացի օգտագործվո՞ւմ են նոր մեթոդներ և որո՞նք են դրանք:
– Մեր հիվանդանոցը բավականին մեծ է և բոլոր ծառայություններն առկա են մեզ մոտ, տարբեր բնագավառի, տարբեր ծանրության վիրահատություններ են իրականացվում: Կիրառվում են վիրահատության տարբեր եղանակներ՝ բաց վիրահատություն, լապարասկոպիա, էնդոսկոպիա: Վիրահատության ձևն ընտրվում է՝ ելնելով հիվանդի ախտաբանական վիճակից, բարդության աստիճանից: Էնդոսկոպիան օգտագործվում է արյունահոսությունները դադարեցնելու, քարահեռացման, պապիլոմաների հեռացման և այլ դեպքերում:
Մեր վիրաբույժների խումբը գիտակ է և պրոֆեսիոնալ, բոլորը ձգտում են նոր մեթոդներ ներդնել, կիրառել: Նրանց մակարդակը թույլ է տալիս ամենաբարդ վիրահատություններն իրականացնել` փորձառության, նաև որոշ սարքերի շնորհիվ: Կան նաև համակցված մասնագիտությամբ մասնագետներ, որոնք ավելի լայն գործունեություն կարող են ծավալել: Հիանալի, բանիմաց կլինօրդինատորներ ունենք, և ցավալի կլինի, եթե այստեղ ապագա չտեսնելով՝ հեռանան երկրից: Այսօր շատերն են հեռանում:
– Ժամանակի ընթացքում եղե՞լ են զարգացումներ:
– Ժամանակի ամենակարևոր դերը, կարծում եմ, փորձառության ձեռք բերումն է, հատկապես, որ մեզ մոտ հիմնականում ընդունվում են չափազանց ծանր հիվանդներ՝ ծանր դեպքերով: Դրա պատճառն է նաև այն, որ ժամանակին այս հիվանդանոցը հանրապետական հիվանդանոց էր և մարզերից բոլոր ծանր հիվանդներն այստեղ են դիմում:
– Ձեր աշխատանքի ընթացքում առավել հաճախ ի՞նչ բարդություններ են հանդիպում:
– Որքան ավելի վաղ ժամկետներում են դիմում, այնքան արդյունքն ավելի լավ է, և բարդությունների հավանականությունն՝ ավելի քիչ: Օրինակ, եթե ուռուցքային խնդիրներով դիմած հիվանդների մոտ ուշացած դեպքեր են լինում, ապա վիրահատությունից հետո հետագայում մետաստազների, մահվան ելքի տոկոսն ավելի բարձր է լինում:
Բարդությունների զարգացումը կախված է նաև հիվանդության ընթացքից:
– Հիվանդների հետ կապ և հսկողություն իրականացվո՞ւմ է վիրահատությունից հետո:
Մեր վիրահատած հիվանդները հիմնականում կապ են պահում և տեղեկություններ ենք ստանում նրանցից կամ ծանոթներից:
Ի՞նչ խնդիրներ կարող եք նշել, որոնք լուծում են պահանջում:
Խնդիրներ շատ կան. դրանց հիմնական մասը սոցիալական է. Հիվանդներն ուզում են բուժվել, բայց փող չունեն և հաճախ ստիպված են հրաժարվել հետազոտություններից և մնալ առանց բժշկական օգնության: Այդ պատճառով պետք է լինի բժշկական ապահովագրություն: Եթե այդ համակարգը նորմալ գործի, շատ հարցեր լուծում կստանան:
– Ձեր խորհուրդը պացիենտներին
Վաղ դիմեն բժշկի, այդ ժամանակ բժշկի ջանքերը կարող են ցանկալի արդյունք չունենալ:
Արմինա Ռոբերտի Նալբանդյան,
Արմենիա հանրապետական բժշկական կենտրոնի վիրաբույժ