Լուրեր
Միջնադարյան մեթոդը կօգնի բժիշկներին կանգնեցնել մանրէների աճը
Մանրէները վտանգավոր հիվանդությունների հիմնական պատճառ են, այդ պատճառով հիվանդանոցներում կարևոր է ամեն բան շատ մաքուր վիճակում պահել: Բժշկական գործիքների մակերեսին կուտակվելով, հիվանդագին միկրոբները կարող են դառնալ մահացու վարակների օջախներ, որոնք ընդունակ են ախտահարել թույլ պացիենտներին: Ինչպես հայտնի է, կանխարգելումը գերադասելի է բուժումից, դրա համար Աստոն Համալսարանի հետազոտողները մշակել են նոր նյութ, որը պատրաստվում է միջնադարյան տեխնոլոգիայով և արդյունավետ կերպով ոչնչացնում է վարակների հարուցիչներին:
Նոր նյութն իրենից ներկայացնում է կենսակտիվ ապակի, նրա կազմի մեջ մտնում են տարբեր մետաղներ, որոնք մշտական արագությամբ իոններ են անջատում: Մետաղի տեսակից կախված, նյութը կարող է օրգանիզմի վրա տարբեր ազդեցություն ունենալ: Օրինակ. նպաստել ոսկրերի ամրացմանը: Ավելի վաղ պարզվել էր, որ կենսակտիվ ապակին կարելի է հաջողությամբ օգտագործել ատամների պլոմբավորման համար:
Գիտնականների կողմից ստեղծված նյութը կազմված է կոբալտի խառնուրդով ապակուց: Այդ խառնուրդն այրվում է վառարանում 1000 աստիճանում: Այդպիսի տեխնոլոգիա է կիրառվել միջնադարում վիտրաժային ապակի ստանալու համար, որը, որպես կանոն, օգտագործվել է վանքերի զարդարման համար:
Որպեսզի ստուգվի, թե որքանով է նման ապակին մանրէների ոչնչացումն իրականացնում, հետազոտողները այն դրել են Պետրիի թասի մեջ, որը լցված է եղել ախտածին մանրէներով: Պարզվել է, որ որքան շատ կոբալտ է պարունակում նյութը, այնքան ավելի արդյունավետ է ոչնչացնում մանրէները: Օրինակ. աղիքային ցուպիկը լիովին ոչնչացել է 6 ժամվա ընթացքում, իսկ արյան վարակ և թոքաբորբ առաջացնող ոսկեգույն ստաֆիլոկոկը ոչնչացել է 24 ժամում:
Պարզվել է, որ միկրոբները ոչնչանում են մետաղների իոնների հետ հանդիպելով, նրանց պատերը պարզապես քայքայվում են: Ավելին, որոշ մանրէներ սպանվում են անգամ նյութի հետ անմիջական շփում չունենալով: Գիտնականները կարծում են, որ ապակին ընդունակ է ոչնչացնել նույնիսկ այն մանրէները, որոնք ձեռք են բերել հակաբիոտիկների նկատմամբ կայունություն: Դրանցով կարելի է պատել տարբեր գործիքներ, որոնք ընդունակ են կանխարգելել վարակը հենց վիրահատական միջամտությունների ժամանակ:
Սկզբնաղբյուր՝ news.ru