Լուրեր
Ռևմատոլոգիական ծառայությունը «Արմենիա» ՀԲԿ-ում
Ռևմատոլոգիական ծառայությունն Արմենիա բժշկական կենտրոնում գործում է արդեն 7 տարի և հիմնականում իրականացնում է ամբուլատոր ծառայություններ, իսկ ստացիոնար բուժվող հիվանդներին, անհրաժեշտության դեպքում, մատուցում է խորհրդատվական ծառայություններ, կազմակերպում համապատասխան բուժում, կարիքի դեպքում` ստացիոնար պայմաններում:
Ի՞նչ հիվանդություններ են ընդգրկվում ծառայության սահմաններում:
Ռևմատոլոգիական հիվանդությունները բազմաթիվ են՝ ամենահաճախ հանդիպողները, հատկապես մեր հանրապետությունում, օստեոարթրիտներն են` հոդերի դեգեներատիվ դիստրոֆիկ փոփոխություններով ընթացող հիվանդությունները, հոդերի բորբոքային հիվանդությունները՝ ռևմատոիդ արթրիտ, պոդագրա, որով հիմնականում հիվանդանում են միջին և բարձր տարիքի գեր տղամարդիկ, համակարգային հիվանդությունները՝ կարմիր գայլախտ, սկլերոդերմիա, Շեգրենի հիվանդություն, պոլիմիոզիտներ, համակարգային վասկուլիտներ՝ հեմոռագիկ վասկուլիտ, Վեգեների վասկուլիտ և այլն, որոնք ավելի քիչ են հանդիպում, բայց ավելի ծանր ընթացք ունեն:
Ի՞նչ գանգատների դեպքում դիմել ռևմատոլոգի:
Ռևմատոլոգիական հիվանդությունների ժամանակ հիվանդի ախտանշանները բազմազան են: Ախտանիշնեը բաժանվում են երկու տիպի՝ տիպիկ ռևմատոլոգիական, սպեցիֆիկ ախտանշաններով (վաղորդյան կարկամություն, հոդացավ, հոդերի այտուց), և ընդհանուր ռևմատոլոգիական` ոչ սպեցիֆիկ ախտանիշներով (մարմնի ջերմաստիճանի բարձրաց, ախորժակի վատացում, քաշի անկում, մարմնի ցանավորում, բերանում` խոցոտում, անոթային ախտաբանությանը բնորոշ տրոֆիկ խոցեր` մատների ծայրերին, գունափոխություններ, աչքերի կարմրություն և այլն), որոնց դեպքում հիվանդը կարող է չմտածել անգամ ռևմատոլոգիական ախտաբանության մասին:
Ինչպիսի՞ միջամտություններ են իրականացվում:
Ռևմատոլոգները չունեն միջամտությունների լայն ցանկ: Կատարվում են ներհոդային ներարկումներ: Ֆիզիոթերապիայի ցուցման դեպքում հիվանդն ուղղորդվում է ֆիզիոթերապևտիկ միջոցառումների: Էնդոպրոթեզավորման ցուցման դեպքում` ուղղորդվում է օրթոպեդ-վնասվածքաբանի մոտ:
Ինպիսի՞ հետազոտություններ են իրականացվում:
Առավել հաճախ կատարվում են ռենտգեն հետազոտություն և հոդի ՈՒՁՀ:
Գործո՞ւմ են զեղչեր, անվճար ծառայություն, և ինչպե՞ս կարող են հիվանդները դիմել:
Ռևմատոլոգիական հիվանդությունները հիմնականում զուգակցված են այլ ախտաբանությունների հետ՝ շաքարախտ, վահանաձև գեղձի խնդիրներ և այլն, մեր կողմից նշանակված բուժումը կազմակերպվում է անվճար ծառայություն ընդհանուր կոմպլեքսում: Ապահովագրություն, սոց փաթեթներ գործում են ըստ կարգի:
Հիվանդները կարող են հերթագրվել ադմինիստրացիայում: Կարող են նաև առանց ուղեգրի անմիջապես դիմել մեր աշխատասենյակ, որի դեպքում մատուցած ծառայությունը վճարովի է: