Լուրեր
Հեմոդիալիզի ծառայությունը «Արմենիա» ՀԲԿ-ում. հարցազրույց բաժանմունքի վարիչ Ռաֆայել Բաղդասարյանի հետ
Ինչպիսի՞ ծառայություններ է իրականացնում բաժանմունքը:
Բաժանմունքում իրականացվում են հեմոդիալիզ և պլազմաֆերեզ, այսինքն, բաժանմունքում բուժվում են տերմինալ քրոնիկական, ինչպես նաև սուր երիկամային անբավարարությամբ տառապող հիվանդները։
Պլազմաֆերեզն առանձին միջամտություն է: Այն երբեմն իրականացվում է նաև հեմոդիալիզ ստացող հիվանդների բուժման ընթացքում:
Պլազմաֆերեզի ցուցումները բազմաթիվ են՝ մաշկային հիվանդություններ, ալերգիաներ, վերարտադրողական խնդիրներ, աուտոիմուն հիվանդություններ: Վերջերս պլազմաֆերեզի նպատկով դիմում են, այսպես կոչված, «հետկովիդային խնդիրներ» ունեցող բուժառուները։
Ի՞նչ հիվանդներ են առավել հաճախ սպասարկվում:
Բաժանմունքում հիմնականում սպասարկվում են դիաբետիկ նեֆրոպաթիա, գլոմերուլոնեֆրիտ, ինտերստիցիալ նեֆրիտներ, երկարատև բարձր զարկերակային գերճնշման պատճառով տերմինալ երիկամային անբավարարություն ունեցող բուժառուները: Երիկամային անբավարարության պատճառներից են նաև ժառանգական հիվանդությունները, որոնցից ամենատարածվածը պարբերական հիվանդությունն է, երբ առաջանում է երիկամների ամիլոիդոզ: Նորագոյացությունները ևս` մետաստազների դեպքում, կարող են առաջացնել տերմինալ երիկամային անբավարարություն, սակայն այդ ժամանակ հեմոդիալիզ չի իրականացվում՝ ելնելով բժշկական մի շարք պատճառներից:
Ի՞նչ աշխատանքային գրաֆիկով են իրականացվում ծառայությունները:
Բաժանմունքը գործում է ամբուլատոր ռեժիմով, չի աշխատում միայն կիրակի օրերին: Աշխատում է 5 հերթափոխով՝ 3/2 գրաֆիկով: Հիվանդները հեմոդիալիզ են ստանում երկուշաբթիից շաբաթ, օրը մեջ՝ 3 անգամ: Երկուշաբթի, չորեքշաբթի, ուրբաթ աշխատում ենք 3 հերթափոխով, մյուս օրերին՝ երկու հերթափոխով:
Ի՞նչ հագեցվածություն ունի բաժանմունքը և ի՞նչ սարքերի օգնությամբ են իրականացվում ծառայությունները:
Ներկայում գործող հեմոդիալիզի սարքերը 18-ն են: Հեմոդիալիզի սարքն անվանում են արհեստական երիկամ: Ունենք չինական արտադրության երկու նոր սարք, որոնց հնարավորություններն ավելի մեծ են և ավելի զգայուն են: Սակայն միշտ էլ առկա է ավելի նորագույն, ավելի զգայուն սարքերով բաժանմունքը համալրելու խնդիրը: Բաժանմունքում առկա է ինժեներական ծառայություն, որն անընդհատ հսկում է բոլոր սարքերը և ստուգում հատուկ ստուգիչ սարքերով:
Բաժանմունքի մահճակալները 14-ն են և տվյալ պահին բավարարում են պահանջներին: Բաժանմունքը հագեցած է անհրաժեշտ գործիքներով և պիտույքներով, ապահովված է հեմոդալիզի համար նախատեսված ջրի մաքրման համակարգով: Նորմայում ջրի մաքրության ցուցանիշը պետք է չգերազանցի 50 միկրոսիմենս/սանտիմետրը, և մեզ մոտ այն 10-ի սահմաններում է: Սա փաստում է, որ ջրի մաքրման համակարգը լիարժեք բավարարում է պահանջվող պայմաններին:
Ինչպե՞ս է կազմակերպվում սպասարկումը:
Անձնակազմը փորձառու է: Հեմոդիալիզի բաժանմունքում մեծ դեր է խաղում միջին բուժանձնակազմը, որն անմիջական և անընդհատ շփման մեջ է հիվանդի հետ: Այստեղ իր մասնագիտությունը չսիրողը չի կարող աշխատել: Հատկապես քրոնիկ բուժառուների հետ աշխատանքն ունի իր պահանջները, որտեղ մեծ նվիրում և համբերատարություն է պահանջվում: Եվ արդեն տարիներով ձևավորվել է հենց այդպիսի թիմ:
Ունենք ավանդույթներ, որոնք աշխատում ենք պահպանել: Հիվանդները երբեմն հոգեբանությամբ փոխվում են, դառնում ծանր, դժվար հարաբերվող` նույնիսկ իրենց տանը, իսկ այստեղ՝ շաբաթական 12 ժամ անցկացնելիս, արդեն երբեմն համարում են, որ իրենց տանն են և իրենց պահանջները ներկայացնում են այնպես, ինչպես` տանը: Դա, ցավոք, երբեմն խնդիրներ է առաջացնում: Փորձառու բուժքույրերը, բժիշկները՝ արդեն ունենալով այդ փորձը, կարողանում ենք հարթել իրավիճակը և խուսափել խնդիրներից:
Արյամբ տարածվող վարակների խնդիրն ինչպե՞ս է կարգավորվում:
Հայաստանում մեծ տարածում ունեն արյամբ տարածվող վարակները՝ հեպատիտներ, ՁԻԱՀ: Մենք հետևում ենք կանոնակարգին, ունենք հեպատիտ C-ով, B-ով հիվանդներ. նրանց սարքերն առանձնացված են և նրանց հետ դիալիզի ընթացքում աշխատում են առանձին բուժքույրեր:
Հասել ենք լավ ցուցանիշների` մեզ մոտ վարակակիրների քանակը չի գերազանցում 2%-ը:
Ավելի քիչ ենք ունենում առաջնակի վարակակիրներ: Մեր հիվանդները նաև պատվաստվում են հեպատիտ B-ի դեմ. ստանում են 3 ներարկում:
Դա կամավոր սկզբունքով է իրականացվում, բայց բացատրելուց հետո, հիվանդները հասկանում են պատվաստման կարևորությունը և համաձայնվում:
Հեպատիտ C-ի բուժում Հայաստանում ներկայում իրականացվում է. թանկ է, բայց կարևորը` հնարավոր:
Կորոնավիրուսի հետ կապված ի՞նչ բարդությունների եք առնչվել:
Կորոնավիրուսի դեպքեր ունեցել ենք, աշխատանքների ճիշտ կազմակերպմամբ հաղթահարել ենք խնդիրը:
Երևանում գործում է Covid դրական հիվանդներին սպասարկող դիալիզի բաժանմունք: Կովիդով հիվանդ հայտնաբերելու դեպքում անմիջապես կապ ենք հաստատում այդ բաժնի հետ, և հիվանդը մինչև ապաքինումը տեղափոխվում ու բուժումն այնտեղ է շարունակում: