Լուրեր
Կլինիկական դեպք. գլխուղեղի էխինոկոկ, պարկաճիճու
Հայտնի է էխինոկոկի 9 տեսակ, միախցիկ էխինոկոկ, բազմախցիկ էխինոկոկ և այլն։ Միախցիկ էխինոկոկի մարմինը կազմված է գլխիկից, որը կրում է ծծիչներ ու կարթերի պսակ։ Սեռահասուն ձևի երկար, մինչև 6 մմ էխինոկոկ մակաբուծվում է շների և վայրի մսակերների բարակ աղիներում։ Երիզորդի համար մարդը միջնորդ տեր է համարվում: Մարդու օրգանիզմում զարգանում է էխինոկոկի թրթուրային ձևերը՝ գոյացնելով բշտեր, որոնց ներքին շերտը սաղմնային հյուսվածք է և առաջացնում է սկոլեքսներ (գլխիկներ) ու դուստր բշտեր։ Էխինոկոկի բշտերի չափը հազիվ տեսանելիից կարող է հասնել մինչև նորածին երեխայի գլխի մեծության։
Կլինիկա է ընդունվել պացիենտ, ով մի քանի տարի շարունակ գանգատվել է գլխացավերից: Վերջին ամիսներին, հատկապես վերջին 20 օրերի ընթացքում, նկատվել է գլխացավի սաստկացում, տեսադաշտի սահմանափակում, ունեցել է սրտխառնոց, փսխումներ, ընդհանուր թուլություն:
Պացիենտին զննելիս նյարդաբանական վիճակը. չափավոր շշմածություն, հարցերին պատասխանում է ուշացումով, նկատելի են չափավոր թաղանթային ախտանիշներ, ջլային անիզոռեֆլեքսիա d>s, աջակողմյան թույլ արտահայտված հեմի հիպեսթեզիա: Ստուգիչ մատնային փորձով հայտնաբերվում է աջակողմյան հոմոնիմ հեմիանոպսիա: Այլ օրգանների կողմից ախտաբանական փոփոխություններ չեն հայտնաբերվել:
ՀՏ հետազոտության արդյունքում հայտնաբերվել է կլոր, շրջակա հյուսվածքներից հստակ սահմանազատված բուշտ` Էխինոկոկի բուշտ, որի պարունակությունը կազմում է լիկվորի խտությանը համարժեք հեղուկ: Պերիֆոկալ այտուցի զոնան բացակայել է: Նկատվել է արտահայտված ճնշող ազդեցություն, մասնավորապես` ձախ կողմնային փորոքի հետին եղջյուրի վրա:
Իրականացվել է վիրահատություն, որի արդյունքում հեռացվել է բուշտը:
Հեռացված էխինոկոկի բուշտը
Հիվանդը դուրս է գրվել առողջացումով:
Դավիթ Պատրիկյան
Մ. Հերացու անվան պետական բժշկական համալսարանի նյարդավիրաբուժության ամբիոն
«Արմենիա» ՀԲԿ նյարդավիրաբուժական բաժանմունք