Լուրեր
Ֆիզիոթերապիայի կիրառման հակացուցումները. հարցազրույց Գոհար Ավետիսյանի հետ
Ֆիզիոթերապիայի կիրառման ի՞նչ հակացուցումներ կան:
Տարբերում ենք ֆիզիոթերապիայի կիրառման հարաբերական և բացարձակ հակացուցումներ:
Բացարձակ հակացուցումներ են ուռուցքային հիվանդությունները և սուր վարակիչ հիվանդությունները: Սուր վարակների դեպքում ֆիզիոթերապիան վտանգավոր է վարակի փոխանցման առումով՝ հատկապես որոշ մաշկային և արյան հիվանդությունների դեպքում:
Տուբերկուլոզը նույնպես բացարձակ հակացուցում է:
Որոշ ֆիզիոթերապևտիկ միջոցառումներ հակացուցված են մինչև երեք տարեկան երեխաներին, սակայն կան ֆիզիոմիջոցառումներ, որոնք ցուցված են նույնիսկ մեկ օրականից, օրինակ` լազերային թերապիան, Էլեկտրաֆորեզը: Մագնիսական դաշտերի կիրառումը ցուցված են մինչև 3 տարեկան երեխաներին, իսկ բարձր հաճախականությունը թույլատրվում է 5 տարեկանից բարձր երեխաներին:
Ֆիզիոթերապիան կրծքավանդակի շրջանում հակացուցված է այն կանանց մոտ, որոնց մոտ կրծքագեղձում առկա է որևէ խնդիր (մաստոպաթիա և այլն), որոնք անգամ դեռ փոփոխության ենթարկված չեն:
Ֆիզիոթերապիայի հակացուցում են հոգեկան հիվանդությունները:
Հարաբերական հակացուցումները նուրբ մոտեցումներ են պահանջում: Օրինակ, եթե հիվանդն ունի արգանդի միոմա և զուգահեռ նաև` կրունկոսկրի խիթ, ապա կրունկոսկրի շրջանում որևէ ֆիզիթերապևտիկ միջոցառում հակացուցված չէ, սակայն այդ նույն հիվանդին հակացուցված է կոնքի շրջանում որևէ միջոցառում։
Հիվանդությունների ընթացքի որ փուլերում է նշանակվում ֆիզիոթերապիա:
Ֆիզիոթերապիան կիրառվում է հիվանդության ենթասուր և քրոնիկ շրջաններում, սակայն կա հիվանդությունների մի մեծ խումբ, երբ ֆիզիոթերապիան կարելի է կիրառել հիվանդության սուր շրջանում, օրինակ՝ գոտևորող հերպեսները։
Վերջին 10 տարվա ընթացքում ուռուցքային հիվանդությունների ժամանակ ֆիզիոթերապիայի վերաբերյալ մոտեցումը փոխվել է. այն դադարել է բացարձակ հակացուցում լինելուց, ավելին՝ գրականության մեջ տվյալներ կան ուռուցքային հիվանդությունների ժամանակ ֆիզիոթերապևտիկ մեթոդների կիրառման մասին: Սակայն Հայաստանում դեռևս դրանցից ոչ բոլորն են կիրառվում: