Պացիենտների համար
- Covid 19
- Մաշկային հիվանդություններ
- Մարսողական համակարգ
- Սիրտ-անոթային համակարգ
- Թերապիա
- Ոսկրա-մկանային համակարգ
- Քիթ-կոկորդ-ականջաբանություն
- Նյարդային համակարգ
- Ուրոլոգիա
- Գինեկոլոգիա
- Առաջին օգնություն
- Էնդոկրինոլոգիա
- Վիրաբուժություն
- Առողջ ապրելակերպ
- Ախտորոշում
Ինչպիսի՞ ջուր է պետք խմել առողջ լինելու համար
Օրգանիզմի համար մեծ է ջրի դերը: Մարդն ավելի հեշտ դիմանում է քաղցին (մոտավորապես 30-45 օր), քան ջրի պակասին: Առանց ջրի օրգանիզմը չի կարող գոյատևել անգամ 5 օր, քանի որ ջուրը կյանքի հիմքն է և կազմում է օրգանիզմի 2/3-ը: Առանց ջրի անհար են նյութափոխանակային և այլ խիստ կենսական գործընթացները:
Շատ կարևոր է օգտագործվող ջրի որակը և քանակը: Ջրի սխալ օգտագործումը կարող է խնդիրների պատճառ դառնալ: Նաև շատ հիվանդություններ կարելի է կանխարգելել՝ ամեն օր խմելով մաքուր, բնական ջուր: Բնական և օգտակար ջուր է լեռնային աղբյուրներից բխող ջուրը, որը հիմնային ռեակցիա ունի, հարուստ է օգտակար հանքանյութերով և որի անմիջական օգտագործումը զերծ է առողջության համար բացասական ազդեցությունից: Սակայն այդպիսի աղբյուրները քչերին են հասու:
Բնակչության մեծ մասն ապահովված է մակերեսային և խորանիստ աղբյուրների ջրերով, որոնք համապատասխանում են որոշակի նորմատիվներին: Ջրի հսկողության ժամանակ մշտապես ստուգվում են նրա քիմիական և մանրէաբանական ցուցանիշները: Եթե հսկողությունը լիարժեք չէ, և տարածքում առկա են տարբեր աղտոտված աղբյուրներ՝ հողի մշակում մեծ քանակի պարարտանյութերով, ջուրը կարող է վնասակար լինել օրգանիզմի համար:
Նման դեպքերում կարծիք կա, որ ջուրը կարելի է մաքրել՝ այն եռացնելով: Սակայն եռացման ժամանակ միայն վտանգավոր մանրէներն են ոչնչանում, մինչդեռ քիմիական նյութերը ո՛չ միայն չեն վերանում, այլև ռեակցիաների արդյունքում դառնում են ավելի վտանգավոր: Օրինակ, նորմայից բարձր քանակի քլորը կարող է առաջացնել վտանգավոր միացություններ:
Առկա ջրամաքրման սարքերն, առավելությունների հետ մեկտեղ, նաև շատ թերություններ ունեն: Նրանք հիմնականում այնքան խորը մաքրում են իրականացնում, որ ջուրը զրկվում է նաև հանքային աղերից, որոնք օգտակար են և անհրաժեշտ: Ըստ ԱՀԿ տվյալների, հանքային աղերից զուրկ ջուրը նպաստում է սիրտ-անոթային հիվանդությունների, իսկ երկաթի բարձր մակարդակ ունեցող ջուրը՝ էնդոկրին համակարգի խնդիրների զարգացմանը: Քրոնիկ նեֆրիտի առաջացումը մեծ մասամբ անորակ և վտանգավոր բաղադրության ջրի օգտագործման հետևանք է:
Ջրի որակի լավացման լավագույն միջոց է նրա սառեցումը. սառույցի մեջ ջրի կազմը փոխվում է և հալեցված ջուրն օրգանիզմի համար չափազանց օգտակար է: Առանձնանում են նաև մետաղները, քանի որ նրանց սառեցման և հալեցման արագությունը տարբերվում է մաքուր ջրի նույն երևույթների արագությունից, և սառեցված ջուրը հալեցնելիս ամենաուշը հալչում է մետաղներ պարունակող մասը: Այդ պատճառով պետք է ջուրը մինչև վերջ չհալեցնել (վերջում սառույցի մի փոքր մաս պետք է թողնել):
Ոմանք կարծում են, որ ջրի պահանջը կարելի է լրացնել թեյի, սուրճի և այլ հեղուկների օգտագործմամբ: Դա սխալ կարծիք է. այդ հեղուկները ջրից բացի պարունակում են օրգանիզմի համար ոչ օգտակար նյութեր, օրինակ, կոֆեինն օրգանիզմը ջրազրկող հատկություն ունի:
Օգտագործվող ջրի քանակի վերաբերյալ կարծիքները հաճախ են փոխվում: Վերջին ժամանակներում տարածված է շատ ջուր օգտագործելու միտումը: Սակայն դա երբեմն կարող է ծանրաբեռնվածություն լինել երիկամների և սրտամկանի համար: Ջրի քանակն անհրաժեշտ է որոշել մարմնի քաշից ելնելով, բայց պետք է օրական 1,5 լիտրից պակաս չլինի: Կարևոր է նաև ջուրը խմել կում-կում, անշտապ:
Հատկապես օգտակար է առավոտյան, քաղցած ժամանակ մեկ բաժակ ջրի օգտագործումը:


