Պացիենտների համար
- Covid 19
- Մաշկային հիվանդություններ
- Մարսողական համակարգ
- Սիրտ-անոթային համակարգ
- Թերապիա
- Ոսկրա-մկանային համակարգ
- Քիթ-կոկորդ-ականջաբանություն
- Նյարդային համակարգ
- Ուրոլոգիա
- Գինեկոլոգիա
- Առաջին օգնություն
- Էնդոկրինոլոգիա
- Վիրաբուժություն
- Առողջ ապրելակերպ
- Ախտորոշում
Ներգանգային հիպերտենզիա
Ներգանգային հիպերտենզիան /ՆԳՀ/ ճնշման բարձրացումն է գլխում: Այն կարող է ի հայտ գալ գլխուղեղի հիվանդությունների ժամանակ/ գլխուղեղային վնասվածք, ուռուցք, ներգանգային արյունազեղում, էնցեֆալոմենինգիտ և այլն/: Առաջանում է գլխի պարունակության ծավալի մեծացման հետևանքով /ողնուղեղային հեղուկի՝ լիքվորի ավելացում, ուղեղի այտուց, երակային կանգ, ուռուցք/:
Ներգանգային հիպերտենզիայի ամենատարածված պատճառը գլխի վնասվածք է: Հաջորդ հաճախ հանդիպող պատճառներից է գլխուղեղի ուռուցքը, որը բարձրացնում է ներգանգային ճնշումը և՛ իր ծավալով, և՛ սեղմման հետևանքով լիքվորի կանգ և կուտակում առաջացնելով:
Գլխուղեղի իշեմիկ ախտահարումները, վարակները նույնպես կարող են առաջացնել ՆԳՀ: Ավելի հազվադեպ հանդիպող պատճառներից է ուղեղի ցիտոտոքսիկ այտուցը /կապարային թունավորում, լյարդային անբավարարություն՝ Ռեի համախտանիշի ժամանակ/:
Երբեմն պատճառ է հանդիսանում հակաբեղմնավորիչների, կորտիկոստերոիդների կամ որոշ հակաբիոտիկների երկարատև ընդունումը:
Բարորակ ՆԳՀ-ն /իդիոպաթիկ ՆԳՀ , գլխուղեղի պսևդոուռուցք/ ևս ներգանգային ճնշման բարձրացման պատճառներից է: Այն հաճախ դիտվում է մեծ քաշով դեռահաս աղջիկների մոտ, բայց կարող է լինել նաև վենոզ սինուսի թրոմբոզի ժամանակ:
Կլինիկական արտահայտությունը
Կլինիկան կախված է պաթոլոգիկ խնդրի տեղակայումից, տարածվածությունից և ընթացքից:
Ախտանշաները
Ախտանշաններն են՝ գլխացավը, սրտխառնոցը, փսխումը, վատ ինքնազգացողությունը:
Հնարավոր են գիտակցության խանգարումներ, հիշողության, ուշադրության խանգարում, ցնցումներ, վեգետատիվ-վիսցերալ խանգարումներ: Լինում են նաև քնկոտություն, ախորժակի անկում, մկանային կարկամություն:
Եթե հիպերտենզիան երկար է տևում, դրան ավելանում է նաև տեսողության խանգարումը, տեսողական նյարդի պտկիկի այտուցը:
Ծանր դեպքերում դիտվում է ուղեղի արտամղում, բրադիկարդիա, շնչառության խանգարում:
Ախտորոշումը
Կարևոր է նախ նյարդաբանի զննումը: Հետազոտություններից արվում են ողնուղեղային պունկցիա, ակնահատակի հետազոտություն, ԿՏ, ՄՌՏ, ՄՌ անգիոգրաֆիա:
Բուժումը
Ներգանգային ճնշումն իջեցնելու համար նշանակվում են միզամուղներ /ֆուրոսեմիդ և այլն/, օգնում է նաև ողնաշարային պունկցիան:
Անհրաժեշտ է շտապ ախտորոշում իրականացնել և բուժումը կազմակերպել՝ առաջնորդվելով հիմնական հիվանդությամբ և պատճառով:


