«Արմենիա» բժշկական կենտրոն
Տեղեկատու. 88 44
Ընդունարան. 8103

Պացիենտների համար

Կոլպոսկոպիա և բիոպսիա

Կոլպոսկոպիա և բիոպսիա

Կոլպոսկոպիան հետազոտման մեթոդ է, որը կիրառվում է գինեկոլոգիայում՝ արգանդի վզիկի, հեշտոցի և արտաքին սեռական օրգանների հետազոտության համար: Հետազոտությունն իրականացվում է կոլպոսկոպով, որի օգնությամբ մի քանի անգամ մեծանում է անհրաժեշտ տարածքը և թույլ տալիս հայտնաբերել ամենափոքր փոփոխությունն անգամ:

 

Առավել մանրամասն տեղեկատվության անհրաժեշտության դեպքում այն համակցվում է բիոպսիայի հետ. վերցվում է հյուսվածքի նմուշ՝ բջջաբանական հետազոտության և չարորակացման գործընթացների հայտնաբերման համար:

 

Կոլպոսկոպիայի և բիոպսիայի նպատակն արգանդի վզիկի նախաքաղցկեղային փոփոխությունների վաղ հայտնաբերումն է:

 

Կոլպոսկոպիայի ցուցումներն են.

 

  • պապանիկոլայ քսուքի անհաջող արդյունքը,
  • արգանդի վզիկի էրոզիան, հիպերպլազիան,
  • պապիլոման,
  • արգանդի վզիկի, հեշտոցի, արտաքին սեռական օրգանների (վուլվա) քաղցկեղը,
  • սեռական օրգանների գորտնուկները,
  • արգանդի վզիկի պոլիպները,
  • մարդու պապիլոմա վիրուսը,
  • էնդոմետրիոզը,
  • արգանդի միոման,
  • հեշտոցից ախտաբանական արտադրությունը` հատկապես արյան հետքերով:

 

Կոլպոսկոպիան և բիոպսիան ցուցված են վերարտադրողական օրգանների օնկոլոգիական ժառանգականությամբ կանանց:

 

Հակացուցումներն են՝ դաշտանը, սուր բորբոքային խնդիրները, հետծննդյան շրջանի առաջին 2 ամիսը:

 

Լայնածավալ կոլպոսկոպիա (ԼԿ)

 

ԼԿ շնորհիվ հնարավոր է մի քանի թեստի զուգակցմամբ հայտնաբերել նաև.

 

  • էրոզիան` ամենավաղ շրջանում,
  • ոչ մեծ նորագոյացությունները,
  • շատ փոքր արյունազեղման օջախները:

 

Իրականացվում է պոլիպների, կոնդիլոմաների, արգանդի վզիկի, հեշտոցի և վուլվայի չարորակ խնդիրների, ինչպես նաև վիրահատության նախապատրաստման (պարզելու բուժման արդյունավետությունը) ժամանակ:

 

Կատարվող թեստերն են.

 

  • Շիլլերի թեստ. գինեկոլոգիական զննման ժամանակ Լյուգոլի լուծույթով մշակվում են հեշտոցը և ցերվիկալ խողովակը: Առողջ բջիջները ներկվում են շագանակագույն, իսկ փոփոխվածները չեն փոխում իրենց գույնը: Չներկված մասից վերցվում է հյուսվածքի նմուշ:
  • Թեստ` քացախաթթվով.  հազվադեպ է օգտագործվում:  Քացախի լուծույթով մշակվում է անհրաժեշտ շրջանը. եթե փոփոխություն չկա՝ անոթները սեղմվում են:

 

Ինչպե՞ս նախապատրաստվել կոլպոսկոպիային:

 

Արգանդի վզիկի կոլպոսկոպիան և բիոպսիան իրականացվում են դաշտանային ցիկլի առաջին փուլում:  Ամենահարմար ժամանակը  դաշտանից հետո 2-3-րդ օրերն են, նաև` բուժման գործընթացներից պետք է անցած լինի 1 շաբաթից ոչ պակաս:

 

Նախապատրաստումը պետք է սկսել 2-3 օր առաջ` նախքան հետազոտությունը. անհրաժեշտ է`

 

  • դադարեցնել սեռական կյանքը,
  • չօգտվել տամպոններից, հեշտոցային մոմիկներից և այլն,
  • չանել լվացումներ,
  • լվացվել սովորական ջրով` առանց օճառի և գելի:

 

Բժշկին պետք է հայտնել առկա ալերգիաների, արյան մակարդելիության, ընդունվող դեղերի և կասկածվող հղիության մասին:

 

Հետազոտությունն անցավ է, տևում է 10 րոպե:

 

Հետազոտությունն անվտանգ է, բայց բիոպսիայի ժամանակ կարող է լինել արյունահոսություն և վարակում:

 

Կոլպոսկոպիայից հետո սահմանափակումներ չկան, սակայն բիոպսիայի դեպքում 2 շաբաթ պետք է հետևել ստորև հրահանգներին.

 

  • բացառել սեռական հարաբերությունը և ֆիզիկական ծանրաբեռնվածությունը,
  • լոգանք չընդունել, չհաճախել սաունա,
  • հրաժարվել լվացումներից, չօգտագործել խծուծներ (տամպոններ),
  • հրաժարվել արյունը նոսրացնող դեղերից:

 

Կոլպոսկոպիան` հղիության ժամանակ

 

Հղիության ժամանակ կոլպոսկոպիան կատարվում է միայն խիստ անհրաժեշտության դեպքում, խիստ ցուցումներով, երբ չկա հղիության ընդհատման վտանգ:

 

Իրականացվում է հետևյալ դեպքերում՝ արգանդի վզիկի էրոզիա, երբ սկսվել է պոլիպների աճ և կասկածվում է ուռուցքային գործընթաց:

 

Իրականացվում է հղիության վաղ շրջանում, անհրաժեշտության դեպքում կարելի է կրկնել 2-րդ կամ 3-րդ եռամսյակում:

17.04.2023