Պացիենտների համար
- Covid 19
- Մաշկային հիվանդություններ
- Մարսողական համակարգ
- Սիրտ-անոթային համակարգ
- Թերապիա
- Ոսկրա-մկանային համակարգ
- Քիթ-կոկորդ-ականջաբանություն
- Նյարդային համակարգ
- Ուրոլոգիա
- Գինեկոլոգիա
- Առաջին օգնություն
- Էնդոկրինոլոգիա
- Վիրաբուժություն
- Առողջ ապրելակերպ
- Ախտորոշում
Իշիաս (նստանյարդի բորբոքում)
Գոտկատեղում և ոտքերում հիվանդագին զգացողությունների պատճառ է նյարդային վերջույթների ճնշումը: Ճնշումը չի ախտահարում նստաներվը, սակայն կարող է լուրջ բարդություններ առաջացնել: Ցավը դիտվում է նյարդի ամբողջ ընթացքով և առաջացնում է հենաշարժական խանգարումներ:
Նստաներվը սկիզբ է առնում ողնաշարի գոտկային հատվածից և իջնում ստորին վերջույթներ՝ կոնքազդրային հատված, սրունքներ և ոտնաթաթեր։
Հիվանդությունն անվանում են նյարդաբորբ (իշիաս)։ Այն մեծ տարածվածություն ունի աշխարհի ամբողջ բնակչության շրջանում։
Ախտանշանները
- Գոտկատեղի, ազդրերի, սրունքների, ոտնաթաթերի թմրածություն,
- զգացողության իջեցում,
- մարմնի վերոնշյալ մասերում մկանների թուլություն,
- ողնաշարի ստորին շրջանում՝ այտուցվածություն,
- ոտքերում՝ պարեսթեզիաներ, ոտնաթաթերի քրտնոտություն,
- ջերմության բարձրացում,
- մաշկի գրգռվածություն,
- խանգարվում են նաև մարսողությունը, միզարձակումը,
- արյան մեջ բարձրանում է հեմոգլոբինը:
Ախտաբանությունը հանկարծակի առաջանում է տրավմայի հետևանքով: Այլ դեպքերում հիվանդությունը զարգանում է դանդաղ։
Ամենակարևոր ախտանշանը տարբեր բնույթի ցավն է՝ ծակող, գնալով աճող կամ կտրուկ սպազմով, կոտրատվածության զգացումով և այլն, ոտնաթաթերում այրոցով, փոքր կոնքի շրջանում՝ ծանրության զգացումով:
Հաճախ դիտվում է նյարդի միակողմանի ճնշում, երբեմն՝ երկկողմանի:
Ցավից բացի բուժառուն գանգատվում է նաև․
- մի դիրքում երկար մնալու դժվարությունից,
- ստորին վերջույթների շարժունակության խանգարումից,
- զգացողության կորստից և մկանային թուլությունից,
- ինքնազգացողության վատացումից։
Նպաստող գործոնները
- Օստեոխոնդրոզ և միջողային սկավառակների դիսֆունկցիա առաջացնող ողնաշարի այլ խնդիրներ,
- միջողային սկավառակների ճողվածքի ճնշում նստաներվի վրա,
- բնակչության գրեթե 90 տոկոսը տառապում է ողնաշարային խողովակի ստենոզով, որը նստաներվի ճնշման պատճառ է,
- միջողային սկավառակի տեղաշարժ՝ տրավմայի հետևանքով,
- ֆիզիկական գերծանրաբեռնվածությյուն, որն առաջացնում է մկանային լարվածություն և սպազմ (հաճախ նստատեղում) , ինչը կոչվում է տանձաձև մկանի համախտանիշ,
- նյարդային վերջույթների շրջանում՝ ոսկրերի վնասում։
Նստաներվի բորբոքում կարող է առաջանալ վարակիչ հիվանդությունների բարձիթողի փուլում (տուբերկուլոզ, թոքաբորբ, գրիպ), գերսառեցման արդյունքում:
Նպաստող գործոններից են հորմոնալ խանգարումները (շաքարային դիաբետ, հիպոթիրեոզ, խպիպ, ճարպակալում), աուտոիմուն խանգարումները: Նորագոյացությունները ևս աճման արդյունքում կարող են նյարդի ճնշման պատճառ դառնալ:
Նստաներվի խնդիրների առաջացման մեջ դեր ունեն նաև մասնագիտական գործոնը, քիմիական նյութերի ազդեցությունը, որոշակի դեղերի օգտագործումը, վնասակար սովորությունները (ալկոհոլի օգտագործումը, ծխելը), նստակյաց ապրելակերպը:
Բարդությունները
Ուշ շրջանում կարող են դիտվել.
- մկանների ատրոֆիա,
- օստեոպորոզ,
- փոքր կոնքի օրգանների դիսֆունկցիա,
- կանանց մոտ գինեկոլոգիական խնդիրներ,
- ստամոքս-աղիքային խանգարումներ,
- մասնակի կամ լրիվ կաթված։
Ախտորոշումը
Անհրաժեշտ է նյարդաբանի, թերապևտի, օրթոպեդի խորհրդատվություն:
Հիվանդի զննումից հետո նշանակվում են հետևյալ հետազոտությունները.
- ռենտգեն հետազոտություն, որը հնարավորություն է տալիս հայտնաբերել դիստրոֆիկ-դեգեներատիվ փոփոխությունները (սպոնդիլոլիսթեզ, օստեոխոնդրոզ, ուռուցքի առկայություն, ախտաբանական աճեր)
- hամակագչային տոմոգրաֆիա, մագնիսառեզոնանսային տոմոգրաֆիա. օգնում են տեսնել ամենափոքր շեղումներն անգամ,
- լաբորատոր հետազոտություններ (արյան ընդհանուր և կենսաքիմիական):
Բուժումը
Նշանակվում է դեղորայքային բուժում, ֆիզիոթերապևտիկ միջամտություններ, բուժական մարմնամարզություն, մերսում:
Որոշ դեպքերում անհրաժեշտ է նաև վիրահատական միջամտություն:


