Լուրեր
Հոդերի ՄՌՏ հետազոտություն. հարցազրույց Նունե Սարգսյանի հետ
Որքանո՞վ է հոդերի ՄՌՏ հետազոտությունն ախտորոշիչ հոդերի ախտաբանության ժամանակ։
ՄՌՏ հետազոտությունը հոդերի համար վերջնական ախտորոշիչ մեթոդ է, քանի որ առավել մանրամասնությամբ, շերտ առ շերտ թույլ է տալիս տեսնել մկանային, ջլային, նյարդային, կապանային համակարգերը, հեղուկի կուտակումները, բորբոքային օջախները:
Հետազոտվում են ծնկան, արմնկային, սրունք-թաթային հոդերը, ուսահոդերը, կոնք-ազդրային հոդերը, ողնաշարը: Բոլոր հոդերի հետազոտությունը կատարվում է ամենայն մանրամասնությամբ:
Ո՞ր հիվանդությունների ժամանակ է իրականացվում հոդերի ՄՌՏ։
Հոդերի ՄՌՏ իրականացվում է հոդերի հետևյալ ախտաբանությունների դեպքում․ ծնկան հոդի կապանների պատռվածքներ, ծնկների սկավառակների՝ մենիսկների պատռվածքներ, հոդերի խորը բորբոքումներ, գոյացություններ, ռևմատոիդ հիվանդություներ:
Միաժամանակ քանի՞ հոդ կարելի է հետազոտել։
Յուրաքանչյուր հոդ հետազոտվում է առանձին, աջ ու ձախ ուսահոդերը, ծնկան հոդերը՝ նույնպես, միայն կոնքազդրային հոդերն են միաժամանակ հետազոտվում:
Սակայն, եթե մի քանի հոդերի հետազոտության անհրաժեշտություն կա, և հիվանդն ի վիճակի է երկար պառկելու, նույն հետազոտության ընթացքում, միմյանց հերթագայելով, իրականացվում է անհրաժեշտ հոդերի հետազոտությունը:
Որքա՞ն է տևում հոդերի ՄՌՏ հետազոտությունը։
Հետազոտության տևողությունը մեկ հոդի համար 25-40 րոպե է: Հետազոտության ընթացքում, անհրաժեշտության դեպքում, որոշվում է տարբեր ռեժիմների, կոնտրաստի ավելացումը (գոյացության դեպքում), համապատասխանաբար, երկարում է տևողությունը:
Բուժառուի համար հետազոտությունը բավականին հեշտ է ընթանում, որովհետև իրականացվում է նրան հնարավորին հանգիստ և հարմար դիրքով:
Ի՞նչ խնդիրներ են լուծում հետազոտության ժամանակ օգտագործվող ռեժիմները։
Կան ստանդարտ ռեժիմներ, որոնց հնարավոր է ավելացնել նաև հավելյալ ռեժիմներ:
Ռեժիմները տարբեր խնդիրների ժամանակ տարբեր են: Մեկ ռեժիմով հայտնաբերվում է կուտակված հեղուկը, մյուսով՝ հեղուկի ճնշումով, ավելի խորն առկա բորբոքումը, մյուս ռեժիմում ճարպն է ճնշվում՝ գոյացությունը տեսնելու համար և այլն: Բժիշկն յուրաքանչյուր դեպքի համար հասկանում է, թե բուժառուին ի՞նչ ռեժիմ է անհրաժեշտ:
Որո՞նք են ՄՌՏ հետազոտության առավելություները և թերությունները այլ հետազոտությունների հետ համեմատած։
ՄՌՏ-ն ախտորոշման լավագույն մեթոդ է փափուկ հյուսվածքների՝ ջլերի, մկանների, նյարդերի, կապանների, դրանց մանր շերտերի համար: Այն ոսկրային հյուսվածքն անհրաժեշտ կերպով չի բացահայտում, միայն մեծ կոոտրվածքների դեպքում կարող է ախտորոշիչ լինել: Բոլոր տեսակի վնասվածքների և ոսկրային կառուցվածքները գնահատելու ժամանակ առավել նախընտրելի են համակարգչային տոմոգրաֆիան և ռենտգեն հետազոտությունը:
ՄՌՏ հետազոտությունն, անհրաժեշտության դեպքում, ցանկացած ժամանակ կարող է կրկնվել, քանի որ այն անվնաս է, և զերծ է վտանգավոր ճառագայթումից:
Մինչև հետազոտվելը պե՞տք է նախապատրաստվել։
Ոչ, որևէ նախապատրաստման կարիք չկա:
Ի՞նչ հակացուցումներ կան։
Հակացուցումները նույնն են, ինչպես ՄՌՏ մյուս հետազոտությունների ժամանակ: Դրանք են՝ բուժառուի օրգանիզմում մետաղական իմպլանտների առկայությունը (բացի տիտանից), նոր ստենտավորված (մինչև 3 ամիս) բուժառուները, հղիությունը՝ մինչև 12 շաբաթականը, սրտի ռիթմավարի առկայությունը, երիկամների ստենտավորումը /(երիկամների ստենտները մետաղական են և շարժվում են):
Եթե հիվանդն անհանգիստ է, շարժվել է, հետազոտությունը չեղյալ է համարվում, որովհետև պետք են կատարյալ նկարներ ստանալ:
Տարիքային սահմանափակում չկա:
Ինչպե՞ս կարող են դիմել հետազոտություն անցնելու համար։
Մեր աշխատանքը հեշտանում է, երբ բուժառուն ներկայանում է կլինիկական բժշկի ցուցումով ու հետազոտման ենթակա հատվածի նշումով:


